आकाशमा उडिरहेका गिद्धहरू
नर बहादुर दाहाल, (दार्जिलिंग)
सिनू खान पल्केका
गिद्धहरू,
आज पनि
सिनू देखेरै होला,
आकाशमा कावा खाँदैछन् ।
उनीहरुको पदचाप सुनेर
फूलहरुको सौन्दर्य ओइलाउँछ .
उनीहरुको नजर लागेपछि
नदी-नालाहरू सबै सुक्दै जान्छ,
किनभने
उनीहरुलाई जीवन चाहिँदैन,
मृत्यु भए पुग्छ ।
सुन्दर, रमाइलो, सुखद
जीवनसंग
उनीहरू सधैं विक्षुव्ध छन् ।
संगीतको सुमधुर लयमा भन्दा
बन्दुक र बमको आवाजमै
उनीहरु विमुग्ध छन ।
यसैले त
उनीहरू
सधैं अतृप्त छन् ,
अनि
पानी पिएर होइन,
रगत चुसेरै
प्यास मेटाउँछन् |