नयाँ बर्षको शुभकामना
गोपाल रेग्मी , (मनासस, भर्जिनिया )
समय साँध यो आयो पुरानो साल फेरियो,
बितेको सालका पुरा घटना चक्र हेरियो ||
थिए क्षण कुनै मीठा मुसुक्क मुसकाउने,
थिए क्षण कुनै फेरी अश्रु धारा सुकाउने ||
उत्साहले भरिएर दिनहरु बिते कति,
आँटेको पुगेन कैले भयो चिन्ता पनि अति ||
साँचेका सपना सप्पै पुरा हुने भए तनि
झर्थे यै लोकमा सप्पै देव देवीहरु पनि ||
सपना बन्नु हो राम्रो सपना बुन्नु पर्दछ
वश छ कर्ममा मात्रै त्यो पनि गुन्नु पर्दछ ||
आशक्ति फलको राखी कर्म गर्दा निरन्तर
नपुग्दा फलको आशा नहुने ब्यग्र को छ र ?
आएको खाली हातै हो जानु छ खाली हातले
न चिन्ताले केही हुन्छ न केही हुन्छ मातले ||
चिन्ताको भूमरी भित्र परिन्छ जब फन्फनी
सम्झनु बेश हो दिन राम्रा हुन्छन् पछि भनी ||
मितेरी नूतनी आए गांसिए मीत फैलिए
बुझाईमा हुँदा अन्तर् एकाधि मन मैलिए ||
मैलिएका मन माझी फेरी सफा बनाउन
परेको छ नयाँ मैत्री अझै गाढा बनाउन ||
अमूल्य पाठ सिकेर बितेको साल गल्तिका
बनाई योजना नौला नव-चेत र चल्तीका ||
कर्ममा डट्नु छ फेरी सम्बत्सर नयाँ भयो
सकियो साल बितेको जे हुनुथ्यो भयो गयो ||
नयाँ जाँगर उत्साह नयाँ जोश उमंगले
सकौं जुट्न सबै हामी कर्ममा नव ढंगले ||
सहजै सकियोस् गर्न बिघ्न बाधाको सामना
नयाँ यो बर्षकोलागि सबैमा शुभकामना ||