श्रीमतीको अस्वस्थतामा-
किशोर पहाडी , (काठमाण्डौं)
बट्टाबाट चियाको
चिया झिकेर
हालेछु तरकारीमा
मसला पो भनी ठानेछु ।
समात्दा समात्दै चिप्लेर
कचौरा टाङ्राङ्ग
खसेछ भूइँमा
पोखियो चारैतिर छररर...
आलु काटेको किन आकार भिन्दै छ ?
आलु साँच्चिकै
आलु भएछ
—तेलमा हालुँ कि नहालुँ भएछ ।
दालमा पानी हाल्ने ?
कि पानीमा दाल ?
तरकारीमा नून कति हाल्ने ?
यो खोर्सानीको धुलो हो कि
बेसारको ?
जिराको कि
धनियाको ?
तिमी बिरामी हुँदा
पसेको छु भान्छामा,
कहाँदेखि शुरु गर्ने—
यो नियमित काम तिम्रो ?
स्वाद पुगेन भन्न सजिलो
नून धेरै भयो भन्न सजिलो
स्वाद र नून राख्न नै गाह्रो भइरहेछ ।
सिसीबाट नूनको
नून झिकेर
हालेछु चियामा
चिनी पो भनी ठानेछु ।
Comments
prakash sayami
Very Good comment by Acharya Prabha
acharya prabha
उसो भए किशोर जी,एक पटक अमेरिका आउनु होस् न त । श्रीमती स्वस्थ्य भएपनि नुन,चिया,चिनी सबै बुढाहरूले चिनी हाल्छन् नी । चिन्नु मात्र कहाँ हो र ? पकाएर खुवाउन नै परिहाल्छ सबै बुढाहरूले ।