प्रेमिल चाह
नीरा शर्मा, (फेयरफाक्स)
खडेरीले ओइलाएको पालुवा जस्तो
धाजा फाट्न तयार बाँझो खेत जस्तो
बेहाल छौ तिमी यतिखेर
यो समय तिम्रो लागि
चिरेर धर्तीको छाती
जीवन मूल फुटाउने
म अमृतको झरी हुन सकुँ ।
पतझडले नांगिएको बगैंचामा
छटपट छटपट पंक्षि जस्तो
छालसँगै हुत्तिएर
पाखा लागेको माछा जस्तो
ब्याकुल छौ तिमी यतिखेर
बोकेर प्रेमिल मन
बहार गाउने वसन्तको
म चरी हुन सकुँ ।
रातले लात हान्दा
दिनले आँखा तर्दा
संघारमा अलमलिइ
तिमी दोधार बाँचेको बेला
च्यापेर निदले लुपुक्क
मीठा मीठा सपना बुन्ने
म परी हुन सकुँ ।
खडेरी वर्षा
बसन्त बहार
सपना बिपना
परी या चरी
जहाँ जे भएपनि
जिन्दगी भर म तिम्रो
वरिपरि हुन सकुँ ।