उमेर
नीरा शर्मा, (फेयरफ्याक्स, भर्जिनीया)
न मैले दिनलाई रोक्न सकेँ
न रातलाई छेक्न सकेँ
बगिरह्यो समय निरन्तर
मैले मात्र पछ्याइरहेँ
लाग्थ्यो
छाता ओडेर घाम छेकेँ
बाँध बाँधेर खोलो रोकेँ
पर्खाल लाएर वतास छेकेँ ।
तर गलत रहेछु म
आँफ्नै गतिमा
हिडिरहेको रहेछ घाम
बगिरहेको रहेछ खोलो
चलिरहेको रहेछ वतास
छाताले केवल घामको
ताप छेकेको रहेछ
बाँधले केवल पानीको
बेग रोकेको रहेछ
पर्खालले केवल बतासको
बाटो बदलेको रहेछ ।
यतिखेर म
रोक्न खोजिरहेछु
घाम, पानी, वतास
जून, तारा, आकाश
र सिंगो समय !
हुन त मैले चाहँदैमा
खै कहँ रोकियो र समय ?
बरु समयको बहावसँगै
अरू पनि धेरै कुरा बगे
बैँस बग्यो
उमेर बग्यो
र सम्पूर्ण जीवन नै
घिस्रिदै घिस्रिदै
ओरालो लाग्यो ।
लालीको रातो पोत्दैमा
कहाँ फर्किदो रहेछ र बैँस
कपाल रङ्गाउँदैमा पनि त
छेकिदो रहेनछ उमेर ।
तैपनि म
समयको मैदानमा
जीवन नदिसँगै
अबिरल बगिरहने
उमेरको बहावलाई
रोक्न खोजिरहेछु
मनको घरातलमा