सम्झनामा तिहार
कृष्ण कटेल, (काठमाण्डौ)
घिन्ताङ्ग घिन्ताङ्ग
गाँउभरी मादल बज्दा
करेसाबारी र बारीको डिलमा
ढकमक्क फुलेको सयपत्री फूल देख्दा
गहभरी आँशु पारेर
मलाई सम्झिरहेकी होलिन् मेरी बहिनी ।
सप्तरंगी टिका किनेर
माइती घर आउँदा मेरी दिदी
मेरो नाममा सयपत्री र मखमलीका
ठुल्ठुला थुंङ्गाको माला उन्न खोज्दा
म नआउने खबरले
पिलपिल आँशु खसाल्दी हुन्
अनि हेर्दिहुन् मेरो फोटो
जहाँ मुस्कुराइरहेको छ उन्को भाइ ।
परदेशबाट फर्किएका साथीसंगीहरु
मेरो अभाब देख्लान्
जसोतसो घन्काउदाहुन् जोरमादल
चारकुने आँगन छिर्कनी मारेर
देउसी र भैली खेल्लान्
दिदी बहिनीको हातबाट टिको लगाउलान्
दियोभरीको घ्युसँगै
बलिरहेको बत्तीसँगै
टोलाइरहेकी मेरी चेलीलाइ
सम्झाइदेउ साथी मन नदुखाउनु भनेर
अनि सुनाइदेउ अर्को बर्ष भाइ
अवश्य आउछ भनेर ।
सन्चारकर्मी
रेडियो राजधानी काठमाण्डौ