घर
विनोद खड्का, (दोहा, कतार )
यात्रामय जीवनका श्रृँखलाहरुमा
भूमण्डलका थुप्रै पाटाहरुमा
अनेक वासहरु बसेको छु
भाषा, भेष र जीवनशैलीले
मेल नखाए पनि
न्यानो माया पाएको छु
हरेकपल्ट मैले
नयाँ घरहरु पाएको छु
उस्तै दुई प्रहर रातहरु
निर्धक्क बिताएको छु
पुरा विश्व नै मेरो घर
जहाँ मैले मेरा जीवनका
केही पानाहरु भरिरहेको छु ।
त्यो घर
जहाँ म जन्मिएँ
अब त्यो रहेन
ढलाईसकेको छ
महत्वाकांक्षाका ढेरहरुले
मेटिसकेको छ
अहंकारका लेपहरुले
हराईसकेको छ
होडबाजीका श्रृँखलाहरुले
तर पनि
बिर्सन सक्दिनँ म
मैले खेलेका ती सुन्दर पिँडी र आँगनहरु
मैले न्यानो पाएका
मुलछेन र अगेनाहरु
मस्त निदाएका फलैँचाहरु
अनि त्यही फलैँचाहरुबाट
अवलोकन गरिएका
ती रमाईला बर्षे झरीहरु
मण्डीमा गुटमुटिँदै
राडीमा मडारिँदै
बिताईएका ती हिँउदहरु
आमाहरुले चलाउँदै गरेका
ढिकी र जाँतोका आवाजहरु
बचाउनै सकिनँ मैले
जोगाउनै सकिनँ
शहर पस्ने रहरसंगै
त्यो सुन्दर बस्ती
जो मेरो घर हो
त्यो सानो छानो
जो मेरो घर हो
त्यो सानो परिवेश
जो मेरो घर हो
बचाउनै सकिनँ ।
परिवर्तनका पाटाहरुमा
नयाँ परिवेशहरु जन्मिने गर्छन
घरैघरहरु विच
फेरी अर्को नयाँ घर खोज्ने
महत्वाकाँक्षाहरु जन्मिन थाल्छन
थाहा छैन कस्तो हुनेछ
त्यो अन्तिम घर!
महान घर!!
१२ जुलाई २०१४,।
