मति बिग्रेपछि
श्याम तमोट, (काठमाडौँ)
मति बिग्रे पछि मान्छे यस्तो जान्दा रैछन्
छिमेकमा बसी घरमा ढुंगा हान्दा रैछन् ।
नमिलेका कुरा भए घरमै राख्नु जाति
आफ्नो घर भाँड्नेलाई किन शिर माथि ?
आफालेर आफ्नी आमा , पराई मान्दा रैछन्
मति बिग्रे पछि मान्छे यस्तो जान्दा रैछन् ।
बगैंचा नै पाउँदा यौटा फूल मात्र खोज्ने
हिमाल नै पाउँदा सानो मूल मात्र रोज्ने
घरको फ्याँकी भिक्षा थापी ज्यान धान्दा रैछन्
मति बिग्रे पछि मान्छे यस्तो जान्दा रैछन् ।
मति बिग्रे पछि मान्छे यस्तो जान्दा रैछन्
छिमेकमा बसी घरमा ढुंगा हान्दा रैछन् ।
