गजल
आनन्द श्रेष्ठ, ( )
टाउकाको मोल राख्ने बेला अर्कैको
मान्छे फरक,कारण उही, खेला अर्कैको
भिडमभीड छ मान्छे यहाँ ओईरो लाग्दैछ
भाषण एउटा, नेता अर्कै, भेला अर्कैको
जानुपर्ने बाटो एउटा, अर्कै गन्तव्य
बल्ल-बल्ल गुडाएको ठेला अर्कैको
गुरू बनी गुरू मन्त्र बाँड्या बेकार भो
आफ्नै ठानेँ, तर पर्यो चेला अर्कैको
डमरू र बाजागाजा सबै मेरो नै
कमाएको नाफा अनि मेला अर्कैको
आजसम्म रूवाएको कै'ले तिर्छौ खै !
अवश्य नै पर्छौ एकदिन फेला अर्कैको ।
Comments
आनन्द श्रेष्ठ
यो गजल प्रकाशित गरिदिनु भएकोमा खसखस डट कम परिवारलाई हार्दिक धन्यबाद छ ।