विश्व विद्यालयको झार
जेबी खत्री, ( )
बर्षेनी छेडेर भुइँ
उम्रिन्छ हरियो झार
आकास छुने उत्साहसाथ
विश्व विद्यालयको आँगनभरि
र बढ्छ वर्षातको झरिसँगै
अग्लो भएर,फुल्छ घमण्डले
फल्छ गौरवले ।
तर
हिउँद लागेपछि
आफैंमा पहेंलिदै जान्छ
बिस्तारै मर्दै जान्छ
पानी पर्न छोडेपछि
चैत वैशाखको खडेरीमा
धुलो उड्ने हुन्छ ।
बर्षा लागेपछि
फेरि उम्रिन्छ
हरियो भएर
वर्षातको झरिसँगै
बढ्छ अग्लो भएर
बिश्व विद्यालयको
परिसरभरि
वर्षेनी विश्व विद्यालयको
आँगन ढाकेर
बेरोजगार युवाहरू झैं
निरन्तर, निरन्तर ।