भोक र मृत्यु
हरिहर दाहाल, (क्यलिफोर्निया)
मैले उनिहरुलाई भात मागें-
उनिहरुले मलाई भात र बन्दुक दिए
मैले पेट्भरी भात खाए र बन्दुक पड्काएँ |
थुप्रै छातीहरु च्यातेँ
अनगिन्ती टाउकाहरु पड्काएँ
रगतका फाल्सा र लासका डुंङुरहरुसँग
मनभरी रोएर पेट्भरी खाएँ |
मैले माटो खाँएँ,रगत पिएँ र ढुङ्गा सुतेँ |
घाइतेहरुको आर्तनाद् सँग
मानवता बाचिन, क्रुरता ओकलेँ
तिनिहरुलाई निचोरी - निचोरी मारेँ|
र मैले उनिहरुको नुनको गुन फर्काएँ|
ठीक तेसबेला उनिहरु
इन्क्लाब-जिन्दाबादका आवाजहरुले
मृत बस्तिहरुमा बिजय उत्सब मनाउदै थिए|
र मैले यसरी भोक सँग मृत्यु साटें,
मनभरी रोंएर पेट्भरी खाएँ |