दुई छेस्काहरु
सुषमा मानन्धर, (ललितपुर)
मानवता
निष्प्राण ढुँगाभित्र
देवता हुन सक्छन् भने
जिउँदो
हाडछालाको शरीरमा
मासुको नरम मुटुभित्र
भगवान किन हुँदैन
सम्वेदना रहित
निर्जिवलाई पुज्दै
ढुकढुकीभित्रको
आत्मालाई कुल्चिनु
घोर विडम्वना नै हो ।
स्वाभिमान
माग्दै नमागेको
एक टुक्रा करुणा फालेर
ठूलो अनुकम्पा गरें
भन्ठानेका होलाऊ ।
भ्रममा नपर ।
अझै आफ्नो
बलबुता र विश्वासमा
खिया लागिसकेको छैन ।
सोचमा माकुराले
जालो हालिसकेको पनि छैन ।
हिँड्न
सयौंको साथ नभएर के भो
साथमा आफ्नो
एक्लो
भरोसा काफी छ ।