जाँदाजाँदै…
प्रकाश सायमी, (ललितपुर)
जाँदाजाँदै आज फेरि मन उधारै रह्यो
ढोकैसम्म पुगेर पनि पाइला संघारै रह्यो
छिचोलेरै पुगेको थेँ, कति आँखा बाधा थिए
चाहना थ्यौ तिमी मेरो सपना पनि आधा थिए
खोलूँ भन्थेँ मनको ढोका सबै अपुरै रह्यो
ढोकासम्म पुगेर पनि पाइला संघारै रह्यो
काँढामाथि टेक्नु पर्यो त्यो पनि त सहेकै थेँ
दुनियाँ नै बैरी हुँदा तिम्रो आफ्नो भएकै थेँ
कुन सीमाना कोर्यौ दैव ! बोली अधुरै रह्यो
ढोकैसम्म पुगेर पनि पाइला संघारै रह्यो