शालीन विद्रोहको समर्थन गर्दैछु!
आश्मा, (ब्याटन रूज, लुजियाना)
परम्परागत घेरा भन्दा
बाहिर उभिएर
म भित्र को ‘म’ लाई
प्रत्याभूति गर्दै
एक्काइसौ शताब्दीको
यो स्वार्थी
मानसिकतालाई
चुनौती दिन चाहन्छु म !
तोते बोलीको शुरुवातसंगै
प्रस्फुटित हुन प्रयासरत
वैयक्तिक स्वतन्त्रताहरु
संस्कारिक रंगले
धमिल्याएपछि
प्रतिबन्धित अवसरहरुसंग
प्रत्येक मोडमा
भेटिने शुरुवात र अन्त्यसंगै
जुध्न आउने दृष्य
केवल प्रश्न तेर्स्याउछन,
तर, अब
हरेक प्रश्नको जवाफ दिनु
या नदिनुको अधिकार
म आफै भित्र समाविष्ट गर्न चाहन्छु!
कुनै औचित्य छैन यहाँ
मेरो शालीन त्यागको
म चाहन्न
आफू हारेर अरुलाई जिताउन,
स्वाभिमानका साथ
विजयमा रंगिएको
संभ्रान्त साँझ
हेर्न लालायित रहर
गुम्स्याउन उचित ठान्दिनँ अब
त्यसैले, म भित्र को ‘म’ लाई
उद्बोधन गर्दै
शालीन विद्रोहको समर्थन गर्दैछु!
