बाबासँग
विद्या सापकोटा, (हालः शंकरदेव कलेज, काठमाण्डौं)
झररररररर…।
झ्याउरे बलेसींमा
टोलाउदै/कहालिदैं
घोरिदैंछु म……॥
तिम्ले धुलौटोमा
कोरेर देखाएका
जीवनका धर्साहरु
केही बिर्संदै/केही सम्झदैं
केही सम्झदैं/केही बिर्संदै ॥
आँखा चिम्लन्छु
कान बज्छ
कुलुलुलु………॥
तिम्ले सम्पुर्णता सिंचेर
बगाएको कुलेसो-'म'
हतास् आँखा उघार्छु
छर्लंग…तिम्रा
रोकिएका सपना
कुँजिएका फींजहरु ॥
मलाई हाँसो मनपर्छ
तिम्ले रुन सिकाएनौं
म हार्न पाउँदिन
निराशा पढाएनौं
खै र ओइलाउने हक
मेरो ज्योति भन्यौ घाम भन्यौ
भुलेर पनि चन्द्रमा भन्दै भनेनौ ॥
स्नेह-फूल फुलाउँछ
स्नेह-आगोको लाभा जन्माउँछ
………………………॥
यहि
एक विश्वास
एउटै आशक्ति
तिम्रो सृजनाको मांसपिण्ड
तिम्रो बालसम्पदा
तिम्रो संयम
तिम्रो अभिलाषाको गुराँस
सगौरव-'तिम्री छोरी म'॥
Happy Father's Day !!
