हालसालैका लेखहरु : उड्ने रहर छ,(उमा शर्मा ) तब पो दशैं आउँथ्यो,(गोतामे साँहिलो) नाप्नै सकिएन ,(रजनी श्रेष्ठ) धेरै सिकायो यो कोरोनाले,(उमा शर्मा) गिद्धहरु रमाउँदैछन्,(बासु श्रेष्ठ) आव्हान,(रजनी श्रेष्ठ) ग्रीन कार्ड,(सुदीपभद्र खनाल) लश्कर,(गोविन्द गिरी प्रेरणा) अभिनन्दन !!!!,(ऋषिराम अर्याल) गड्यौला उर्फ सत्यराज ,(कृष्ण बजगाईं )

पक्षपात

श्याम तमोट, (भोजपुर)

 

हिजो अस्ति जस्तै देवी आँगन बढाएर पधेंरा लागिन । पानीको गाग्री विसाएर घाँस काट्न जान खाजा थाप्तै गर्दा उनको दाजु रमेश उठेकै थिएन । एक  डोको घाँस पालीमा राखेर घर भित्र देवी पसेकी मात्र थिइन रमेश स्कुलतिर लाग्यो ।

साँझ जब देवी गाईको थलोमा सोत्तरको भारी बिसाउँदै थिइन रमेश स्कुलबाट घर भित्रियो ।

देवी भात खान लाग्दा बत्ती बोकेर तलामा चढेको रमेश देवीले जुठो भाँडा माझी सकेर तलामा गई किताव झिक्ता नझिक्ता निदाई सकेको थियो ।

आमाले "दिउँसो स्कुलमा पो पढ्नु पर्छ महँगो तेल बालेर पनि सकिन्छ ?" भन्दा देवी भर्खर किताव खोलेर पढ्न थालेकी मात्र थिइन् ।

"छोरी नाथेले पढेर के लछार्नु छ र ?" भन्ने बाबुको भनाई सुने ता पनि 'छोरीले पनि पढ्नु पर्छ । आफ्नै खुट्टामा उभिन सक्नु पर्छ । छोरा र छोरी भनेका मानिसका दुई आँखा जत्तिकै हुन' भनेर स्कुलमा सरले भन्नु भएको कुरा देवीको मनमा ढुंगाका अक्षर भएर कुंदिएको थियो ।

एकदिन दुइदिन गर्दै दशै आयो । नयाँ लुगा लगाएर रमेश पिङ खेल्न गई सकेको थियो ।

आमाले 'ला तंलाई' भनेर एक जोर लुगा दिनु भयो । देवी रमाउँदै लुगा फेर्न लागिन । सर्ट लगाई सकेर जव मिडि लगाउन खोलेकी मात्र थिइन् उनको मन एक तमासले दुख्यो । यत्ति दुख्यो कि यस अघि कहिल्यै यसरी दुखेको थिएन । उनलाई आफू संसारमा सवैभन्दा अपहेलित प्राणी लाग्यो । थ्याच्च भुईँमा बसेर उनी क्वां-क्वां रुन लागिन ।

'किन डाको छाडेकी हँ यस्तरी' भनेर आमाले सोध्दा पनि देवी एकनास रोई नै रहिन ।

उनको छेउमा रमेशको पुरानो पेन्ट उल्टाएर बनाएको मिडि असरल्ल परेको थियो ।

Comments

Prativa

Nice one sir!! Short but very well expressed. Hope to see more in future.

puspa raj giri

कथा छोटो मिठो र मर्म स्पर्शी छ | अरु पनि लेख्दै गर्नु है ? तर एउटा कुरा भनु लेखक ज्यु लाइ ???? रिसानी भए माफ है ?  यस्ता कथा हरु आज भन्दा २० वर्ष पहिले का होलान है ??? जमाना धेरै फेरीइसक्यो, छोरी लाइ वावा आमाले त के बुहारी लाइ पनि सासु ससुराले एस्तो पक्षपात गर्ने जमाना छैन है | हजुर कै गाउ घर तिर भए माफ |

सम्पर्क माध्यम

khasskhass@gmail.com
Share |