घर्तीमगर अभिनन्दित हुने, भूमरीले रचना वाचन गर्ने ,(समाचारदाता)
रोल्पा असार १२ ।
ललित साहित्य परिषद्, रोल्पाले साहित्यकार गायत्री घर्तीमगरलाई अभिनन्दन गर्ने भएको छ । परिषद्को आज शनिबार लिबाङमा सम्पन्न बैठकले यस वर्षको भानु जयन्तीको अवसरमा घर्तीमगरलाई अभिनन्दन गर्ने निर्णय गरेको हो । बैठकले अभिनन्दित हुने घर्तीमगरको व्यक्तित्वमाथि प्रकाश पार्ने जिम्मा साहित्यकार सीता शर्मालाई दिने निर्णय गरेको छ । विशेष गरी छन्द कविता लेखनमा सक्रिय घर्तीमगर परिषद्का संस्थापक सदस्य हुन् भने उनका जिन्दगी गजलसंग्रह र राप्तीका छाल कवितासंग्रह प्रकाशित छन् ।
असार २९ गते लिबाङमा भव्य रुपमा २०१ औं भानुजयन्तीको मनाउने निर्णय भएको परिषद्का अध्यक्ष ओम केसीले बताए । सो अवसरमा खुल्ला कविता प्रतियोगितासमेत आयोजना गरिएको केसीले जानकारी दिए ।
त्यस्तै परिषद्ले हरेक महिनाको अन्तिम शनिबार सञ्चालन गर्दै आएको एकल रचना वाचन कार्यक्रममा यस पटक प्यूठान निवासी साहित्यकार भावेश भुमरीको एकल रचना वाचन हुने भएको छ । यही असार २६ गते हुने कार्यक्रममा भूमरीको व्यक्तित्वमाथि प्रकाश पार्ने जिम्मा साहित्यकार रमेश सुवेदीलाई दिइएको छ ।
यस्तै मासिक रुपमा सञ्चालन हुँदै आएको स्रष्टा चौतारीको ३५ औं शृङ्खलाको संयोजन ललित साहित्य परिषद्ले गर्ने निर्णय भएको छ । यस पटकको शृङ्खला असार १५ गते परेकोले दहीचिउरा खाँदै रचना वाचन गरिने परिषद्का हासचिव नवीन लोचनमगरले जानकारी दिए ।
यस्तै परिषद्का कोषाध्यक्ष खबपु चञ्चल मगरले यही असार ४ गते बिहे गरेको परिषद्ले बधाई दिने निर्णय गरेको छ ।