गीती-गजल
रमेश खकुरेल, (काठमाण्डौ )
झ्यालको एक खापा खुला राखुँला जूनको रश्मि जस्तै तिमी च्याउनू
फूलका पत्रले सेज बिच्छ्याउँला सेजकी राजरानी बनी आउनू ।
एउटा गीतको थालनी थालुँला कोइली कण्ठ खोली तिमी गाउनू
केमरा फूलको हार ली आउँला केशसज्जा बनाई तिमी लाउनू ।
चन्द्रमापट्टि फर्की चखेवा चरी विश्व बिर्सेर हेरीरहेझैं गरी
रूप तिम्रो निहारी म पूजा गरूँ प्रेमदेवी छरी प्रेम मुस्काउनू ।
नाम होस् मन्त्र अभ्यर्थना स्तोत्र होस् संझनै ध्यान होस् स्वप्न यो सत्य होस्
भेद सारा तिमीमा ममा मेटियोस् एक भै जिन्दगीमा तिमी छाउनू ।
भक्तिको शक्तिले तृप्तिको दीप्ति होस् मुक्ति चाहिन्न आनन्द यस्तै रहोस्
भेटिँदामा तिमी जे कुरा पाइयो अन्त यस्तो कहाँ के गरी पाउनु ।