रंग बिचार
गोपाल रेग्मी, (वाशिंगटन डी. सी .)
कविशिरोमणिको देखासिखीमा 'रंग बिचार'
यौवन गुलाफी, अधर गुलाफी |
आँखाले बोल्ने भाषा गुलाफी ||
डुब्छन जो प्रेमै रस भित्र काफी |
देख्छन यो सारा धरती गुलाफी ||
आकाश नीलो, पहाड नीलो |
कन्चन सफा त्यो समुद्र नीलो ||
फालेर हेर्दा मनको धमिलो |
सारा जगै हुन्छ पवित्र नीलो ||
लोभै छ कालो, द्रब्यै छ कालो |
रागै छ रीसको निष्पट्ट कालो ||
तोडेर फ्याँक्दा ईर्ष्याको जालो |
देखिन्छ संसार सबै उज्यालो ||
दानै छ सेतो, ज्ञानै छ सेतो |
परोपकार अझै हिमाली सेतो ||
उक्लेर हेर "म" भन्ने नेटो |
सारा जगत नै झलमल्ल सेतो ||
जनवरी ३०, २०१०
