ऋण
हरि घमिरे, (भर्जिनिया)
म घरमा आएँ
पत्नीलाई सोधें-
"खाना पाक्यो?"
पत्नीले सुमधुर जबाफ दिई-"पाक्यो"
"ऋण तिर्यौ त?"
पत्नीले भनी-"तिरें"
"ऋण बोकायौ त"
पत्नीले भनी-"बोकाएँ"
मैले भनें-"त्यसो भए पस्क"
अब म ऋण खाँदैछु
अथवा असुलेको ऋण खाँदैछु
खाएको ऋण पनि तिर्दैछु
कमाएको सम्पत्तिको पनि
ऋण बोकाउँदैछु
मेरा बाबु-आमा-
म सक्छु सक्तिन थाहा छैन
तर सावा-ब्याज बुझाउँदैछु
मलाई तमसुक-केही चाहिदैन
वकिल पनि चाहिदैन
जसको जति खाएको छु
तिर्दै जान्छु
बाँकी रहेको अर्को वर्षमा बुझाउँछु
मेरा छोराछोरी-
ऋण पनि बोकाउँदै छु
उनीहरुले तिर्छन्-तिर्दैनन् त्यो पनि थाहा छैन
मैले पनि वकिल-तमसुक केही राखेको छैन
एउटै साक्षी ईश्वर छन्, अविश्वास गर्ने ठाउँ छैन।